<strong>LILARD UGASIO LEJKERSE - Portland negostoljubiv prema 'jezerdžijama'</strong>

U Moda Centru ekipa Portlanda, predvođena Demionom Lilardom, razbila je goste iz Los Anđelesa, ekipu Lejkersa rezultatom 127:115.

Sa čak 10 trojki već u prvoj dionici, Lilard i ekipa dali su do znanja Lejkersima da nemaju šta da traže u Moda centru. Poslije 12 minuta igre Portland je imao ubjedljivih 34:19. Do poluvremena se domaći nisu zaustavljali, pa su do odlaska na odmor imali prednost rezultatom 65:46.

Nakon pauze uslijedio je revolveraški obračun u trećem kvartalu. Obije ekipe su se ‘raspištoljile’ i pružile pravi ugođaj ljubiteljima košarke. Četvrtina je završena rezultatom 36:33 za Portland, pa su tako domaći pred posljednju četvrtinu vodili sa 22 poena razlike.

Posljednja dionica pripala je gostima iz Los Anđelesa, koji su uspjeli da samo ublaže ionako ubjedljiv poraz i postave konačnih 127:115.

Demion Lilard bio je vrlo raspoložen i ubacio je 40 poena, uz 8 pogođenih trojki iz 14 pokušaja. Šarp je dodao 15 poena, a po poen manje upisali su Simons i Tajbul.

Malik Bizli bio je najraspucaniji kod Lejkersa sa 22 poena. Najbolji je bio Entoni Dejvis sa 19 poena i čak 20 skokova, a povratnik Rasel dodao je 16 poena.

Portland je na 11 mjestu Zapada sa skorom 28-29, a Lejkersi su sve dalje i od borbe za plejin, na 13 poziciji sa skorom 26-32.