Španski stručnjak Pep Gvardiola produžio je ugovor sa Mančester Sitijem do 2025. godine a potom naglasio da nije Aleks Ferguson.
Dugogodišnji menadžer ‘građana’ Pep Gvardiola, potpisao je produžetak saradnje sa tim klubom do 2025. godine, a potom je poručio i vlasnicima kluba i navijačima da nema namjeru postati ‘novi Aleks Ferguson’.
Ser Aleks Ferguson vodio je njegovog gradskog rivala, Mančester Junajted, od 1986. do 2013. godine, postao je legenda kluba i najuspješniji trener u istoriji, ali Gvardiola ima drugačije planove za budućnost.
‘Do kada ću biti ovdje? Do trenutka kada osjetim da nešto nije kako treba ili dok prosto ne budem želio da budem više ovdje, tada ću dati otkaz, budite uvjereni u to. Ja nisam, niti imam želju, da postanem novi Ferguson ili Venger pa da na istom mjestu budem 20 godina.’ priznao je Pep, a potom je dodao:
‘Nedavno sam produžio ugovor, ali to je samo parče papira. Ukoliko se zasitimo jedni drugih, definitivno neću ostati ovdje samo zbog tog papira.’
Gvardiola je u Siti stigao 2016. godine i od tada se četiri puta okitio titulom u Premijer ligi, i osvojio je jedan FA Kup. Ipak, do sada nije uspio da ‘kompletira’ svoj mandat trofejom u Ligi šampiona.
Prije dvije godine imali su sjajnu priliku, igrali su u finalu protiv Čelsija i bili su poraženi.
