Igrač Pinar Karšijake Erik MekKalum govorio je pohvalno o ekipi Crvene zvezde Meridianbet u podkastu portala ‘Basket News’.
U analizi utakmice koju je ekipa sa Malog Kalemegdana dobila protiv Asvela, MekKalum je rekao da će crveno-bijeli biti jako dobri ove sezone.
”Imaju mnogo opcija, prije svega dosta šutera i opcije u napadu su raznolike. Size na krilnim pozicijama je sjajan. Rokas Giedraitis i Adam Hanga su ključni, ali ono što je mene impresioniralo je kontrola skoka. Imali su 17 ofanzivnih skokova i šutirali su 50 odsto za tri. Ako nastave da kontrolišu skok na taj način i da šutiraju tako biće vrlo uspješni.” rekao je Erik.
Zaključio je da će četa Duška Ivanovića biti u borbi za plej-of a ne u plej-in turniru, gdje će se za doigravanje boriti ekipe od sedmog do desetog mjesta.
”Nalaze šuteve koje će dobiti kreacijom Šabaza Nejpira i on će sam naći otvoren pogled ka košu. Drago mi je što smo pogledali jednu ovakvu utakmicu i gde smo vidjeli njihovu vještinu i talenat. Crvena zvezda je sila, igraće u plej-ofu a ne u plej-inu.” zaključio je MekKalum.
