Košarkaš Šarlot Hornetsa Majls Bridžis predao se pravosudnim organima nakon izdavanja naloga za hapšenje zbog nasilja u porodici.
Tu vijest saopštilo je odjeljenje šerifa okruga Linkoln u Sjevernoj Karolini. Bridžis je pušten uz kauciju poslije tri sata u pritvoru.
On je optužen za nasilje nad maloljetnicama i da je prekršio zabranu prilaska koja je određena poslije prve presude za nasilje u porodici još 2022. godine.
Kako prenosi ESPN, on je 6. oktobra bacio bilijarske kugle na automobil njegove bivše partnerke u kome su bili i njegovo dvoje djece.
Bridžis nije igrao prošle sezone, a NBA liga ga je suspenovala na 30 utakmica u aprilu. Ostalo mu je još 10 mečeva suspenzije na početku nove sezone.
LA Klipersi su ga birali na draftu, 2018. godine, kao 12 pika. Odmah je poslat u Šarlot gdje je postao jedan od najboljih igrača ekipe.
