Bivši svjetski šampion i veteran Formule 1 Fernando Alonso, kazao je da mu nije jasno zašto se Luis Hamilton buni na bolide svoje i konkurencije.
Sezona u Formuli 1 počela je loše za Luisa Hamiltona i Mercedes, koji, očito je, nema konkurentan bolid za najveće domete.
To je Hamilton isticao više puta, to su priznali i šefovi tima.
Alonso se slaže s tim da su Red Bul i Ferari sklopili brže i bolje mašine, ali da je tako oduvijek bilo.
“Ne znam šta je toliko priče. Ovo je i uvijek je bilo tako. Kada je Airton Sena pobjeđivao i osvajao titule, imao je najbrži automobil. Kada sam ja bio najbolji imao sam najbolji bolid, tako je bilo i u Šumaherovo vrijeme. Luis je oborio mnoge rekorde jer je, jednostavno, vozio najbrži bolid. Prosto i jednostavno. On ove sezone može da vozi savršeno, da ne napravi nijednu grešku, a na kraju da bude 13. na trci. To je Formula 1”, kazao je Španac.
Naredna trka Formule 1 je 8. maja u Majamiju.
Šarl Lekler u Ferariju je lider sa 86 bodova, ispred Red Bulovih Maksa Ferstapena (59) i Serhija Peresa (56), dok je Hamilton tek sedmi sa 28.


