Selektor Hrvatske, Ivica Tucak, bio je zadovoljan nakon plasmana svoje ekipe u polufinale Svjetskog prvenstva.
“Barakude” su danas, u Dohi, bile bolje od Srbije rezultatom 15:13.
“Zatvorili smo sve ono što je trebalo kod Srbije. Marko (Bijač) je bio odličan na našem golu, igrači su pomagali jedan drugome. Naša rkešenja s igračem više su bila odlična. Ono što sam govorio, ali nisam reagovao posljednjih dana kada sam slušao i čitao kako naši igrači navodno nemaju odlučnosti i tako dalje… E, ni govora! Imaju oni i te kako hrabrosti i odlučnosti, ali ono što ja želim da nam igra ima glavu i rep, da odigramo akciju. To smo radili, to smo imali. Mislim da je utakmica bila predivna, kao što je uvijek s njima”, rekao je Tucak za “Jutarnji list”.
Hrvatska je sjajno zaustavila Dušana Mandića, čini se da je to upravo bio ključ pobjede.
“Da, ali onda moraš malo druge negdje da pustiš, pa smo “procureli” lijevo kod Strahinje Rašovića. Ušli smo svjesno u taj rizik. Međutim, mislim da smo ih dobro zatvorili, isto kao što smo dobro “snimili” njihovog igrača više. Znali smo tačno što igraju, ko izlazi iz prve linije. Bila je to sve u svemu jako, jako dobra utakmica. Bilo je grešaka, pa i s naše strane, ali rekao bih utakmica za ocjenu “pet minus”, dodao je Tucak.
Hrvatska će se za finale boriti protiv Francuske.
